Vi forbannar oss over den lange vinteren, turar som minner om årskavalkadar for været som har vore og solbrune og lettstemte søringar som allerede har sykla eit par månader før vi kjem oss ut på vegen. Men til trass for dette. Det er få ting som kan slå ein sykkeltur i vår kjære landsdel. Stille og vakre sommarkveldar, kontrasten mellom den grønne kysten og dei snøkledde fjelltoppane ein klar vårdag, dei smale vegane som presser seg inn mellom hav og fjell, det opne og storslåtte landskapet som både gjev ei kjensle av å vere liten og ein del av noko større, alle dei trivelege og pratesjuke folka på fråflyttingstrua stader som aldri eller sjeldan stjeler overskriftene.

SESONGEN

Sykkelsesongen i Nord-Noreg går frå siste halvdel av april til september. April, mai og slutten av september kan vere lunefulle med tanke på snø og frost. Samstundes er det fullt mogleg å få seg mange mil på sykkelsetet i april, september og til og med oktober om været slår til. Det er også geografiske skilnader i vår langstrakte landsdel. Kystnære område kan ha lengre sesongar, og det er ikkje uvanleg med snøfrie periodar i vintermånadene.

Om du skal reise til Nord-Noreg er siste halvdel av mai, juni, juli og august dei sikre periodane. Då kan du i tillegg sykle på alle tider av døgnet. Det er midnattsol og lyst heile døgnet i perioden fra mai til siste del av august. Perfekt for lange turar.

VÆR OG VIND

Det er mykje vær og vind i Nord-Noreg. Vi kan ha fine dagar der det mogleg å sykle i kortbukser og oppbretta armar, men når sommaren vert oppsummert kan vi ofte telle desse på hendene til ein nordnorsk kystfiskar. Og då må du rekne med eit par amputerte fingrar etter eit tøft yrkesliv. Det er berre å ta ein kjapp titt på gjennomsnittstemperaturen. I Tromsø ligg han på litt under 13 grader i juli som er den varmaste månaden. Tøyet som du brukar om våren og hausten gjer også si nytte på mange sommardagar. Været skifter dessutan fort, spesielt ved kysten. Dette er viktig å ta høgde for når du drar ut på tur.

VEG OG TRAFIKK

Tromsø, Finnsnes (Senja), Lofoten og Vesterålen har eit vegnett der du ofte kan ta fleire rundturar med base på ein plass. Her ligg mange av dei flotte turane rundt nokre av dei største øyene i landet som Senja, Langøya, Kvaløya og Vestvågøy. I Finnmark er det ofte berre ein stamveg (E6 eller E69) med isolerte avstikkere til kysten. Det er ikkje utan grunn at det kan vere omkjøring via Finland om E6 er stengt. Du syklar deg heller ikkje vill sør for Bodø, sjølv om vegnettet er noko meir utbygd enn i Finnmark.

Det er ikkje mykje trafikk på nordnorske vegar, spesielt om du held deg på mindre fylkesvegar. E6 og dei andre Europavegane er noko heilt anna enn same vegar i andre delar av landet. E6 i Nord-Noreg kan samanliknast med ein godt trafikkert fylkesveg på sentrale austlandsområdet eller E39 på Vestlandet. Du må rekne med litt meir trøkk på vegane til populære turistmål under fellesferien og innfartsårene til dei største byane.

KOST OG LOSJI

Du kjem langt på nordnorsk gudstru og sjøbris, men etterkvart må det påfyll til i form av mat og drikke. Det er ikke flust med kafear og spisestader langs vegane, og dei som finst er av ymse kvalitet. Heldigvis blir den kritiske sansen kraftig redusert etter eit titals mil i nordavinden. Men dei siste åra har det dukka opp kvalitetsstader der ingen trudde at nokon skulle bu, spesielt om sommaren. Ein trend som forhåpentlegvis held frem.

På mange turar må ein likevel sette sin lit til daglegvarebutikkar. I distrikta har desse ofte ein kaffekrok der det er mogleg å slå av ein prat med lokalbefolkninga om været, vegstandarden og fiskekvotene. Men mange daglegvarebutikkar i distrikta stenger ofte tidlegare. På søndagar og heilagdagar må du i nokre tilfelle basere deg på å ta med det du treng. Det er vanligvis ikkje noko problem å fylle flaskene på turen med friskt fjellvatn.

I kvar enkelt turomtale vil vi nemne kafear verdt å besøke, samt matbutikkane langs vegen. Men det er også viktig å undersøke dette sjølv før turen.

LOGISTIKK

Om du kjem med sykkel til landsdelen er Nasjonal sykkelrute 1 eller Euro Velo 1 Atlantic Coast Route det naturlege valet om du ikkje vil dampe oppover E6. Det vil du ikkje. Det som etterkvart har vorte kjent som Kystriksvegen er ei veldig fin rute. Om du kjem frå utlandet  kan du anten følge Euro Velo 7 Sun Route eller Euro Velo 11 East Europe Route. Båe desse går inn i Finnmark og ender opp på Nordkapp. For oss kan det vere meir aktuell om vi skal sykle nedover kontinentet når det er mogleg.

Det er andre grenseovergangar frå Sverige til Nord-Noreg. E12 til Mo i Rana der du kan sykle inn på Nasjonal sykkelrute 1 utan å treffe E6, RV77 (95 på svensk side) som går gjennom vakre Junkerdalen og Storjord der han kjem inn på E6 som du må følge til Rognan før du evt. kan ta av på mindre trafikkert veg. Du har også E10 over Bjørnefjell og E8 som kjem ned i Skibotn. Men desse er nok meir trafikkert.

Sjølv om nordlendingar banner mykje over samferdselen er han forholdsvis godt utbygd både til og frå og innad i landsdelen.

Det går tog til Bodø og Narvik der du kan bestille plass til sykkelen. Men hugs å gjere det på førehand, det er eit avgrensa tal plassar. Du kan bestille plass på nett på vy.no eller ta kontakt med kundeservice til SJ som køyrer desse strekningane. Prisen for sykkelplass er tilsvarande ein barnebillett.

Om du skal reise i Nord-Noreg er Hurtigruta og hurtigbåtar fine alternativ, i tillegg til regionale bussruter mellom byar som t.d. Bodø-Narvik, Narvik-Tromsø, Tromsø-Alta. Det er ikkje informasjon om sykkel ombord på Hurtigruten, men det skal visstnok koste 100 kr. Sykkelen blir plassert på bildekk.

I Nordland kan du ta med deg sykkel gratis på buss og hurtigbåt. På nokre båtruter kan du bestille plass. I Troms og Finnmark fylkeskommune kostar det tilsvarande ein barnebillett (ei øvre grense på 60 kr) å ta med sykkel. Sykkel på ferger er vanlegvis gratis. Båe fylka har atterhald når det kjem til plass. Dette kan spesielt vere aktuelt på buss der det er mindre plass. Reis Nordland og Tromskortet er gode sider der du finner oppdatert informasjon om reise med sykkel samt rutetabellar for buss, båt og ferger.

Dei fleste flyavgangane får du frå Oslo til Tromsø og Bodø. Men det går også direkteruter til Harstad/Narvik (Evenes), Lofoten, Helgeland og fleire stader i Finnmark. Det er også ruter fra andre stader til Nord-Noreg, t.d. Trondheim-Bodø/Tromsø og Bergen-Tromsø.

Ikkje gap over for mykje om du har tenkt å sykle i fleire av regionane våre. Det er lange avstander her i nord. Samstundes er det fullt mogleg å kombinere fleire område på ein tur. Aksen mellom Tromsø og Bodø er til dømes fin. Her kan du sende bagasjen med Hurtigruten (NorLines), sykle mellom dei ulike områda og ha base på enkelte plassar for fleire rundturar. Dette er ei oppskrift som det er mogleg å følge fleire stader langs kysten. Det er kanskje risikabelt å gå inn i lokaliseringsdebattar, men om du er på utkikk etter ein base der det er mogleg å ta fleire rundturar er Tromsø, Finnsnes, Sortland og Leknes fine plasser.

OM SIDA

Nordetter er ei side om sykling i Nord-Noreg. Vi håpar sida kan vere til hjelp for folk som har lyst å sykle i Nord-Noreg. For dei som kjem til landsdelen, men også folk som bur her. Vi legg ut turar som vi sjølv set pris på, og som vi håpar andre kan få glede av. Vi prøver å gje tips om mat og drikke, lokale bakkar, grusparti og andre ting som kan gjere turen endå betre. Mange av rutene er skildra som dagsturar, men det er også fint å ta dei over fleire dagar med overnattingar.

Har du tips, forslag til turar og spørsmål. Ta kontakt!

• Facebook
• Instagram